Search

Þögla hættan

Það veltur á hversu mikið öryggi (psychological safety) ríkir í teymum hversu viljugt fólk er að segja hluti upphátt. Það ósagða getur haft skelfilegar afleiðingar - ýmist sýnilegar eða algjörlega ósýnilegar:

Ég sé mistök - en vil ekki vera sú sem alltaf er að tuða

...mistökin komast upp löngu seinna og það tekur margfaldan tíma/orku/fjármuni að vinda ofan af þeim.

Mér sýnist hún gefa sjúklingnum of stóran skammt af lyfi - en það er ekki minn staður að segja læknum til

...fleiri dauðsföll og alvarleg frávik.

Ég er með frábæra hugmynd sem gæti aukið virðið úr verkefninu - en yfirmaðurinn veit best þannig að ég segi ekkert

...verkefnið skilar því sem vænst var af því ... engu meira.

Ég skildi orð flugumferðastjórans á annan hátt - en flugstjórinn er með miklu meiri reynslu en ég ... hann hlýtur að vita betur

583 manns láta lífið í mannskæðasta flugslysi sögunnar.

Það liggur eitthvað þungt á mér í dag en ég ætla ekki að segja fólki það, því þá vita þau að ég er ekki alltaf á fullum afköstum

... teymisfélagar eyða ómældri orku í að hugsa hvað þeir hafi gert viðkomandi... af hverju hann sé svona fúll út í þau, afköst allra minnka & andrúmsloftið verður þvingað.

Þú sem leiðtogi þekkir örugglega margar svona sögur úr þínu umhverfi og þinni reynslu. En fjöldi svona atvika er margfalt meiri en okkur grunar.

  • Þetta eru frávikin sem eru aldrei skráð.

  • Þetta eru glötuðu tækifærin.

  • Þetta eru mannslífin sem hefði verið hægt að bjarga.

  • Þetta eru nýjungarnar sem aldrei komust á teikniborðið.

  • Þetta er samtalið sem hefði getað bjargað orðspori fyrirtækisins.

  • Þetta eru erfiðu starfsmannamálin sem hefði svo auðveldlega verið hægt að koma í veg fyrir.

  • Þetta eru öflugu starfsmennirnir sem hætta.

  • Þetta er árangurinn sem aldrei átti séns.

Ef okkur langar að fyrirtækin/stofnanirnar okkar nái árangri/lifi af/skari fram úr í flóknum óvissu heimi þýðir ekki að vera strúturinn.

  • Fjárfestum í fólki

  • Fjárfestum tíma í að tala um erfiðu hlutina

  • Fjárfestum tíma í að byggja upp okkar eigið öryggi og hugrekki þannig að við getum haft frumkvæði að og mætt inn í þessi samtöl

  • Fjárfestum tíma í að búa til umhverfi þar sem öryggi og rými er til að tala um fleira en innihald verkefnanna okkar

Því þetta eru fjárfestingarnar sem skila okkur árangri í hröðum flóknum heimi.

#Mjúku-málin-eru-grjótharða-stöffið #Teymisþjálfun #Teymisþróun #Þögnindrepur