Ég hef ofurtrú á því að við búum öll yfir þeim krafti sem við þurfum á að halda til þess að blómstra og lifa innihaldsríku lífi. Við þurfum “bara” að finna hann innra með okkur og leysa hann úr læðingi. 

Leiðin okkar þangað er oftast ekki bein og breið og því miður engin uppskrift til sem hentar öllum. En lykillinn er að byrja þar sem við erum akkúrat núna og vita hvert við viljum fara. Fyrsta skrefið felst því oft í því að komast að því hvert við viljum í raun stefna og af hverju þessi vegferð er okkur mikilvæg. 

Mér reynist oft erfitt að útskýra hvað það er sem ég geri í markþjálfunarsamtölum því það er svo samofið mér sem persónu. Í flæðinu verður markþjálfunartæknin framlenging af mér. Hugleiðslur hafa fært mér dýpri nærveru í núinu þannig að ég get verið algjörlega til staðar í samtalinu og skynjað hvað það er sem þarf að tala um. Í samtölum þar sem athyglin og orkan fer á það sem við getum stjórnað fara ótrúlegir hlutir að gerast. 

Fyrir mér er markþjálfun svolítið eins og list sem ekki verður skilin til fulls með rökheilanum. Mig langar að hvetja þig til að prófa og upplifa og skoða hvort þetta er aðferð sem hentar þér í átt að enn innihaldsríkara lífi.