.png)
Eitt það merkilegasta sem ég uppgötvaði í markþjálfunarnáminu mínu var hversu léleg ég var að hlusta til að skilja fólk. Eitthvað sem ég hafði talið mig MJÖG góða í. Þegar ég fór að fylgjast með hvað gerðist á meðan ég var að hlusta kom ýmislegt í ljós:
Ég átti mjög hávært ráðaskrímsli sem langaði svo mikið að koma sínum ráðleggingum að. Ráðaskrímsli sem fannst það oft eiga lausnina á lífsgátunni. Ég vissi samt að ég sjálf fór örsjaldan eftir þeim ráðum sem ég fékk frá öðrum. En mín ráð höfðu virkað svo vel fyrir mig - þau hlutu að virka líka fyrir aðra.
Ég sá líka að athyglin mín var ekki alltaf á að hlusta - heldur var hún upptekin við að finna svör og reyna að koma þeim að - eða móta næstu spurningu - eða hugsa hvað ætti að vera í kvöldmatinn....
Ég veit ekki hvort þú tengir við þetta?
Ég fór að æfa mig markvisst í að hlusta til að skilja.
Ég æfði mig í að setja ráðaskrímslið í frystikistuna og aðeins taka það fram þegar það átti við.
Ég æfði mig að hlusta til að hlusta og gera ekkert annað á meðan.
Ég æfði mig í að gefa innsæinu rými og treysta því til að koma með spurningarnar og speglanir sem eiga við.
Þegar við hlustum til að skilja:
…sýnum við fólki virðingu. Þegar fólk upplifir að því sé sýnd virðing byggist traust upp hraðar. Traust er grundvöllur alls í samskiptum.
…verður til sameiginlegur skilningur miklu hraðar. Við náum árangri hraðar saman því við náum að útkljá misskilning miklu fyrr.
Með þessum æfingum mínum hefur mér farið mikið fram - en ráðaskrímslið og öri heilinn koma samt reglulega í heimsókn - ég er bara orðin betri í að sjá þegar þau mæta og meðvitað leggja þau til hliðar.
Hvað segir þú um að gera tilraun:
Næst þegar þú ferð inn í mikilvægt samtal - prófaðu að fylgjast með því sem gerist á meðan þú ert að hlusta. Skoðaðu niðurstöðuna eftir samtalið og þá getur þú metið hvort þú þurfir að setja upp hlustunar-æfingar-prógramm